城市閘誌x慧惠： 榮記五金

【 慧惠 X 城市閘誌：榮記五金 】 「由一塊不銹鋼片製成一個盆子，郭兆榮先生不需任何黏貼工具，看起來就像摺紙般。」 呢句就係小妹第一次睇住郭生揼不銹鋼片嘅感受。小妹希望將郭生工作過程畫喺鐵閘上面，籍以宣揚正失傳嘅民間工藝。 郭生（花名：大口）喺鴨脷洲威咗至少四十多年喇，由佢細細個喺鴨脷洲打交，至成為打鐵師傅，到依家擔任鴨脷洲康樂部主任。郭生為鴨脷洲社區服務數十年，街坊人人都識佢。閒時郭生中意坐喺舖頭門口同人傾計，特別會關心女街坊近況，並望住鴨脷洲小島街道發生嘅一切和人生百態。 鴨脷洲係一個有濃郁文化色彩，凝聚力強嘅社區，每年農曆二月十三日舉辦嘅鴨脷洲洪聖傳統文化節，喺2014年被列為「香港非物質文化遺產」，文化節節目包括有：接神儀式、放水燈祈福、傳統龍舟拜廟、賀誕會景巡遊、正誕日(洪聖寶誕)進廟祝壽上香祈福、賀誕神功戲、宴請紅伶晚宴、頒贈旗典禮、綜合表演晚會及送神儀式等。 最後多謝郭生嘅信任，香港青年藝術協會、城市閘誌嘅安排，渣打香港150週年慈善基金嘅贊助，以及助手青蛙嘅協助。